S.C.R. "LEDICIA"

CONCURSO DE CARTEIS XVII FEIRA DO BONITO 2011

2011-05-18T11:04:00.003+02:00

A SOCIEDADE CULTURAL RECREATIVA E MUSICAL "LEDICIA", DE BURELA (LUGO) CONVOCA UN CONCURSO DE CARTEIS CO GALLO DA XXVII FEIRA DO BONITO QUE TERÁ LUGAR O VINDEIRO 6 DE AGOSTO DE 2011 NA EXPLANADA PORTUARIA DALOCALIDADE.

= BASES =

1. Poden participar tódalas persoas que o desexen.
2. Convócase o concurso en dúas categorías:
• Categoría A: concursantes ata 14 anos
• Categoría B: concursantes maiores de 14 anos
3. O tema debe ter - necesariamente - relación co bonito e/ou co ensalzamento da Feira.
4. O encabezamento do traballo será: XXVII Feira do Bonito, e deben aparecer tamén o lugar e data de celebración da mesma: Burela, 6 de agosto de 2011.
5. A técnica a empregar é libre, pero no caso de traballos que se presenten en soporte informático, deben acompañarse dun exemplar impreso.
6. As medidas para os traballos son:
• Cat. A: 15 x 20 cm., e un máximo de tres cores
• Cat. B: 50 x 65 cm. colorido libre
7. Cada autor pode presenta-los traballos que desexe, vindo estes sen firmar e acompañados dun sobre pechado cos seus datos no interior e a súa categoría no exterior.
8. Os traballos poden entregarse ata o día 14 de xuño de 2011 no Local Social da S.C.R. Ledicia, ben persoalmente (os martes de 13 a 15 horas, ou os mércores de 20:30 a 22:30 horas), ou por correo (Rúa do Ril n° 4 – entr/baixo 27880 - Burela).
9. Premiarase un traballo por categoría; correspondendo o gañador da Categoría A ó programa de man; e o da Categoría B ó cartel anunciador da Feira.
10. Os premios consistirán en obsequios representativos da Feira e entregaranse o día de celebración da mesma.
11. Tódolos orixinais quedarán en poder da S.C.R. Ledicia.
12. A participación neste concurso implica a aceptación das presentes bases.

¡¡ GRAZAS POLA VOSA PARTICIPACIÓN !!

I SERÁN LEDICIA 2011

2011-05-09T16:51:00.004+02:00

A S.C.R. Ledicia organiza este sábado o I SERÁN, unha xuntanza informal de músicos, bailaríns e afecionados á música tradicional. Xuntarémonos a partir das 8 da tarde, e contaremos coa participación dos membros do corpo de Música e Baile tradicional da Asociación, pero gustaríanos contar coa vosa tamén. Agradeceríamos que tódolos interesados se puxesen en contacto con nós para poder organizar os turnos de actuación. Gracias por adiantado e, tanto se queres participar ou só botar unha ollada, ESPERÁMOSVOS A TODOS!!!

OBRADOIRO DE ENTROIDO 2011

2011-05-09T15:20:00.020+02:00

DESPOIS DE DOUS ANOS... VOLTAMOS CON MÁIS GANAS CA NUNCA

2011-05-09T14:39:00.007+02:00

Podes seguirnos aquí ou na nosa conta de Facebook (busca Ledicia Scr). Agardamos a túa participación!!!

COMEZA A SEMANA CULTURAL LEDICIA 2008

2008-11-16T13:40:00.004+01:00

Este ano tódalas actividades terán lugar na carpa instalada na Praza da Mariña. Queremos animarvos a que vos acheguedes e participedes, pois hai sitio para todos. Velaquí o programa de actos polo miúdo:

Sábado 15 de Novembro
16’00 h. - Tarde de convivencia de afecionad@s ás labores e manualidades (bordado, bolillos, patchwork, manualidades…)
18’00 h. - Actuación de Cantareiras.

Domingo 16 de Novembro
16:30 h. PC BAILE, unha combinación de baile e novas tecnoloxías.

Martes 18 de Novembro
18’30 h. - Imos de cine ….. DONKEY XOTE

Mércores 19 de Novembro
18’30 h. - Xoguemos co outono: pintura, manualidades, xogos…

Xoves 20 de Novembro
18’30 h. - Imos de cine ….. BEE MOVIE

Sábado 22 de Novembro
19:30 h. - Magosto popular (gratis)
20:00 h. FESTIVAL DE FOLCLORE TRADICIONAL. Durante o festival farase entrega dos premios do Concurso de Contos “En galego… coma sempre”
21’30 h: Verbena co grupo ALMA LATINA

EXPOSICIÓN: Dende o sábado 15 de novembro ate o sábado 29 de novembro, na Rúa Rosalía de Castro (fronte a Ferretería “El Puente”), estarán en exposición os traballos da anterior tempada de cursiños 07/08: Pintura ó Óleo, Patchwork+pintura sobre tea, e encaixe de bolillos

Organiza: S.C.R. LEDICIA
Colaboran: Concello de Burela
Deputación Provincial de Lugo: Delegación de Cultura
Xunta de Galicia: Secretaría Xeral de Política Lingüística
Xunta de Galicia: Consellería de Cultura
Federación Galega de Grupos de Danza
El y Ella
Tendencias

CONCURSO DE CONTOS

2008-10-16T21:05:00.006+02:00

Cada 17 de Maio celébrase con grandes titulares o Día das Letras Galegas, pero non debemos esquecer que o ano ten ademáis outros 364 días, e que é moi importante que ó longo de todos eles o galego se manteña entre nós. Con ese motivo, e coa intención de afianzar o uso do idioma galego entre as distintas xeracións, a Sociedade Cultural e Recreativa Ledicia, co patrocinio da dirección Xeral de Política Lingüística, convoca un Concurso de contos que se rexirá polas seguintes

= BASES =

1. Poden participar persoas de tódalas idades formando parellas, de xeito que cada parella se compoña dun/dunha avó/avoa e dunha/dun neta/neto.

2. É tamén posible que a parella a formen un/unha bisavó/bisavoa e o correspondente bisneto/bisneta.

3. Establécense catro categorías:
• Parellas nas que o neto ou neta teñan ata 7 anos.
• Parellas nas que a neta ou neto teñan dende 8 ata 12 anos.
• Parellas nas que o neto ou neta teñan dende 13 ata 16 anos.
• Parellas nas que a neta ou neto teñan máis de 16 anos.
4. O conto debe estar redactado en galego e o tema é libre.
5. O prazo de presentación de traballos está aberto ata o día 31 de Outubro de 2008.
6. Os traballos estarán escritos en papel ou cartulina tamaño A-4, cunha extensión máxima de 4 páxinas.
7. Os traballos deben ir sen firmar, acompañados dun sobre cos datos d@s autor@s, indicando claramente a idade d@ participante máis nov@.
8. Os traballos deben entregarse no Local Social de Ledicia, ben persoalmente (os martes entre as 8 e as 10 da noite), ou por correo: Rúa do Ril n°4 , Entr/baixo 27880 – Burela (Lugo).

9. Os premios serán entregados coincidindo con algunha das actividades da Semana Cultural Ledicia 2008, e o lugar e a data concreta serán oportunamente anunciados.

10. Os traballos orixinais pasarán a ser propiedade de Ledicia, que se reserva o dereito de expoñelos e/ou publicalos nun futuro.

11. A participación no concurso implica a aceptación das presentes bases.

Cóntanos un conto … en galego, coma sempre!!

ARRANCA A "XXIV FEIRA DO BONITO"

2008-08-02T00:38:00.011+02:00

CHEGOU O GRAN DÍA!!!!

Durante toda esta semana varias ducias de persoas estivemos a traballar arreo para que todo esteña a punto para o gran día do Príncipe Azul. Todo está preparado para encende-lo lume de madrugada, así que ESPERÁMOSVOS A TODOS NA EXPLANADA DO PORTO DE BURELA sobre as 6 da tarde de hoxe PARA DESGUSTA-LO BONITO, preparado coma sempre: COCIDO, ASADO, E EN EMPANADA. Para todos aqueles que queiran remata-la comida con algo doce, poderán mercar biscoito, tarta de mazá, roscas, ...

XXIV FEIRA DO BONITO

2008-07-18T14:52:00.008+02:00

PRESENTACIÓN OFICIAL DO CARTEL ANUNCIADOR DA FEIRA E DO PROGRAMA DE ACTOS.

FIN DE CURSO 08/07

2008-06-23T10:36:00.003+02:00

Onte, domingo 22, realizamos a tradicional Camiñata ó Monte Castelo, aínda que o día estivo pasado por auga. Por desgracia a área recreativa estaba cuberta de néboa e orballaba cando chegamos. Afortunadamente, somos xente ben disposta e positiva, polo que a auga non nos desanimou e pasamos un día moi divertido, entre churrasco e xogos populares.
Agardamos que todos os que nos acompañástedes o pasáredes moi ben, e repitades o ano que vén. A todos os que non estiveron alí, queremos animarvos a que participedes na próxima ocasión.
Procuraremos que as fotos esteñan disponibles o máis axiña posible para que vexades o ben que o pasamos.

Viaxe a POLA DE SIERO (7-Xuño-08)

2008-06-11T15:28:00.006+02:00

CABALGATA DE REIS 2008

2008-06-11T14:05:00.024+02:00

Lamentamos a espera, pero aquí están as imaxes da visita das SS.MM. de Oriente este último Nadal. Seguro que máis de un, e de unha, se botará a rir ó verse nalgunha das fotografías. Esperamos que o pasárades ben e agardámosvos o ano que vén!

XANTAR FIN DE CURSO 06/07 - MONTE CASTELO

2008-05-30T11:38:00.022+02:00

FEIRA DO BONITO 2006

2008-05-30T11:17:00.009+02:00

MEMORIA « FEIRA DO BONITO »

2008-05-30T11:09:00.003+02:00

A “Feira do Bonito” vénse celebrando en Burela dende o ano 1983, de xeito continuado e con tan só dúas excepcións nos primeiros anos, por causas de forza maior. Este ano 2008 celebrará a súa XXIV edición.
A Feira nace – e mantense – no seo da Sociedade Cultural e Recreativa “Ledicia”, co afán de promocionar e facer ve-lo valor un producto que por aquel entón, e aínda hoxe, tanto representa para Burela e a comarca da Mariña Lucense: o Bonito.
Os comezos da Feira foron humildes, pois a súa celebración era o complemento dunhas Xornadas Culturais que xa naqueles anos tiñan sona na nosa bisbarra. Pero pouco a pouco, a Feira foi tomando entidade propia e buscando o seu espazo.
Coa colaboración de diversas entidades, tanto públicas como privadas, e co traballo de moitos voluntarios, a Feira convértese no que é hoxe. Cada 1º sábado de Agosto transforma a paisaxe da nosa Mariña atraendo ata Burela unha verdadeira marea humana de máis de 10.000 persoas de diversas idades e condicións. A súa continua progresión valeulle para ser recoñecida oficialmente como Festa Galega de Interese Turístico no ano 1999.
Aínda que o traballo real xa se inicia varios días antes, o día da Feira a xornada comeza moi cedo, pois, coma unha perfecta engrenaxe, os moitos voluntarios organízanse para ter todo a punto arredor das seis da tarde. A partir dese momento, o público comparte protagonismo co Bonito. Chega a hora do Pregón, do recoñecemento á axuda prestada, do folclore, das actuacións para animar a velada… pero, por riba de todo, chega a hora de comer, porque non cabe dúbida de que un bandullo satisfeito é a mellor publicidade para o Bonito, para a Feira… e para toda a comarca.
Así é como o Bonito se converte no “rei” do seu día, pois ó seu redor móvense a música, o baile e o traballo de máis dun cento de voluntarios que durante unha intensa xornada preparan máis de 3.200 k. deste excelente peixe para disfrute dos padais que se achegan a degustalo. Desta forma, tentamos conseguir que o recordo dese bo sabor leve ós nosos visitantes a demandar o “Príncipe Azul” nos seus lugares de orixe, aproveitando a tempada de verán, na que poden consumilo fresco.
Por conseguinte, e como resumo, podemos dicir que cada 1º sábado de Agosto, a S.C.R. “Ledicia” organiza a Feira do Bonito, que neste 2008 celebrará a súa vixésimocuarta edición, e que nos últimos anos vén obtendo unha afluencia de público superior ás 10.000 persoas, o que repercute económica e turísticamente non só en Burela, senón en toda a Mariña de Lugo.

HISTORIAL DA SOCIEDADE CULTURAL RECREATIVA E MUSICAL “LEDICIA”

2008-05-29T12:05:00.008+02:00

Por se alguén aínda non nos coñece, velaquí un pequeno historial da asociación.
A Sociedade Cultural Recreativa e Musical LEDICIA nace en BURELA a comezos dos nos setenta, sendo constituída oficialmente o 22 de Novembro de 1974. Na actualidade conta con preto de 300 familias asociadas, o que supón que se moven dentro da asociación cerca de mil persoas.
Nos primeiros tempos o Canto Coral e o Teatro foron as principais actividades da asociación, acadando numerosos éxitos nas súas actuacións. Pero de inmediato xurde o afán por coñecer e conservar as nosas raíces e tradicións, e nace así a Escola de Baile e Música Tradicional, que conta dende o seu inicio con gran aceptación e forma alumnos e alumnas dende os catro anos en diante, e que segue a ser o piar máis sólido da asociación.
Ó longo dos anos, moitos son os nenos e nenas que medran ó son da Escola, facendo as delicias de vellos e novos cada vez que suben ó escenario. Como resultado do seu traballo na Escola, ademáis das distintas actuacións que se celebran na vila, os grupos máis representativos teñen actuado por gran parte de Galicia e as comunidades veciñas, así como en Francia e Portugal.
Estes son algúns exemplos deses lugares:
* En Galicia: Moaña, O Grove (Festa do Marisco), Pobra do Caramiñal, Xermade, Xubia, Baiona (Romaría da Virxe da Roca), Chantada, Antas de Ulla, Meira, Portomarín (Domingos Folclóricos), Baldaio, Pereiras (Mós), Torneiros (O Porriño), Arbo… e a maioría dos Concellos da Mariña Luguesa. Son tamén de destacar as actuacións na TVG nos programas Luar, Galicia Enteira e Galicia para el Mundo; así como en Tele-Lugo no programa A carón da Lúa.
* En Zaragoza, na Festa do Pilar
* En Navarra: Irurtzun e Berriozar.
* En Urretxu, Guipúzcoa
* En Pradoluengo, Burgos
* En Cigales, Ciguñuela e La Seca, provincia de Valladolid
* En León: Cacabelos, Toreno, Matarrosa de Sil, Vaillablino e Bembibre
* En Asturias: Xixón, Valdés (Luarca), Pola de Siero, Valdesoto e Carreña de Cabrales
* En Burdeos (Francia), recibimos a “Travesía Azul” organizada por Greenpeace e as Cofrarías do Cantábrico contra as redes de deriva usadas por parte da flota boniteira europea.
* En Portugal: Santarem, Carreço (Viena do Castelo), Arouca, Valença do Miño, Raimonda (Paços de Ferreira), Aveiro, São Martinho do Campo, Vale de Cambra, Valpaços, Sta. Mª de Oliveira, Bairro,…
A gran maioría destas actuacións fanse a xeito de intercambio cultural con outras agrupación similares, do que se pode deducir que de case tódolos lugares antes citados teñen pasado por Burela grupos de Folclore para amosarnos parte da súa cultura e para formar parte das nosas actividades. Algúns destes intercambios fanse gracias á colaboración da Federación Galega de Grupos de Danza, da que a S.C.R. LEDICIA forma parte xunto con outros aproximadamente cincuenta grupos.

Ademais de todo o relacionado co folclore, Ledicia participa activamente na vida cultural de Burela, organizando ou formando parte activa da organización de actividades de moi diverso tipo: a Cabalgata de Reis, o desfile de Entroido, procesións, exposicións, cursiños, conferencias,… sendo os dous pratos fortes do ano a Semana Cultural – no outono – e a Feira do Bonito no verán.

MEMORIA DE ACTIVIDADES – ANO 2007

2008-05-29T11:11:00.007+02:00

Velaquí unha relación das actividades realizadas no pasado ano 2007. Esperamos poder repetilas este ano e contar de novo coa vosa participación.

= Xaneiro =

● Organización da Cabalgata de Reis.

● Visita dos Reis á Residencia de Maiores de Burela.

● Inicio do Curso 2007 de Pintura ó Óleo.

● Continuación dos cursiños de Encaixe de Bolillos, Patchwork e Pintura sobre tea.

= Febreiro =

● Participación na Comisión Organizadora do Antroido Burela 2007.

● Organización da Cea-Baile Antroido 2007.

● Participación da Charanga “A Pataqueirada”, pertencente á Asociación, en varios desfiles de Antroido: Lalín, Verín, Vegadeo, Cangas (Foz), Abadín, Burela, Lourenzá...

= Marzal =

● Participación na Feira XANTAR (Ourense), promocionando xunto con ABSA e o Concello de Burela, a Feira do Bonito como máximo exponente turístico de Burela.

= Abril =

● Colaboración coa Confraría de Semana Santa: participación do grupo de Baile e Música Tradicional da Asociación nos actos para os que foi requerido.

● Participación na Feira de Antigüidades de Arévalo, promocionando a Feira do Bonito, amparada pola participación do Concello de Burela cun stand promocional, e respostando á amable acollida que nos dispensaron no mes de xullo pasado na presentación da pasada edición da Feira.

= Maio =

● Colaboración coa Residencia de Maiores de Burela nos actos da festa de Aniversario: actuación do Grupo de Baile e Música Tradicional da Asociación.

● Viaxe de intercambio cultural do grupo de Baile e Música Tradicional a Castrillón (Asturias).

● Colaboración coa Comisión organizadora da “Festa da Marosa”: cesión de material.

● Colaboración coa Comisión Organizadora das Festas Patronais Burela 2007: organización de Procesións e participación do grupo de Baile e Música Tradicional da Asociación nas actividades para as que foi requerido.

= Xuño =

● Colaboración coa comisión organizadora das Festas Patronais Burela 2007 nos actos que se realizaron dentro deste mes.

● Festival de Fin de Curso da Escola de Baile e Música Tradicional da Asociación.

● Camiñata ate o Monte Castelo, e xantar de irmandade para celebrar o fin de curso.

● Colaboración coa Peña Madridista de Burela: cesión de material para a realización dunha sardiñada.

● Colaboración coa Asociación de Sendeirismo “Pasada das Cabras”: cesión de material para a realización dunha sardiñada/churrascada.

● Colaboración coa S.C.R. Palestina: cesión de material para a celebración da festa de S. Xoán.

● Colaboración coa Peña Celtista de Burela: cesión de material para a celebración dunha sardiñada.

= Xullo =

● Colaboración con outros colectivos de Burela, cedendo material para actividades tipo sardiñadas.

● Colaboración coa comisión organizadora do “San Cristóbal 2007”: participación do grupo de Música Tradicional da Asociación na Procesión.

● Presentación na Feira de Mostras de Ferrol da XXIII Feira do Bonito, actividade de promoción turística apoiada pola participación do Concello de Burela.

● Viaxe de intercambio cultural do Grupo de Baile e Música Tradicional a San Pedro de Bairro – Vilanova de Famalicão (Portugal).

● Colaboración coa comisión organizadora da Romería do Monte Castelo: cesión de material, axuda personal e participación do grupo de Música Tradicional.

= Agosto =

● XIII Feira do Bonito.

● Actividades culturais do grupo de Baile e Música Tradicional: participación no Mercado Tradicional de Cervo, e na Festa da Malla en Rúa.

● Actuación de intercambio do Grupo de Baile e Música Tradicional en Nois (Foz).

= Setembro =

● Colaboración co Clube Náutico de Burela: cesión de material para a celebración da V Festa do Clube Náutico.

= Outubro =

● Inicio do curso na Escola de Baile e Música Tradicional da Asociación. As clases teñen lugar perante todo o curso escolar, mantendo os ensaios no verán cos grupos que participan nos intercambios con outras Asociacións similares á nosa.

● Actuación de intercambio do grupo de Baile e Música Tradicional en Mondoñedo.

● Inicio do curso 2007/08 de Encaixe de Bolillos.

= Novembro =

● Inicio do curso 2007/08 de Patchwork + Pintura en tea.

● Organización da Semana Cultural LEDICIA 2007:
* Exposición dos traballos realizados nos cursiños da etapa anterior ( Pintura ó Óleo, Encaixe de Bolillos, Patchwork + Manualidades + Pintura en tea)
* Ciclo de Cine Infantil.
* Visita cultural e talleres artesanais que nos axudan a manter na memoria dos máis novos as nosas tradicións e oficios.
* Festival de Folclore coa participación de grupos de Galicia, Asturias e Portugal.

= Nadal =

● Festival de Folclore Infantil, con participación da S.C.R. Ledicia e o Grupo Espolín de Castrillón (Asturias).

● Colaboración co centro de día “San Aníbal”, rexentado pola congregación “Hijas del Divino Celo”, nas actividades de Nadal.

● Visita á Residencia de Maiores na Noiteboa, para desexarlles Boas Festas.

● Colaboración cos centros escolares coa cesión de material para as actividades de Nadal.

BENVIDOS Ó NOSO BLOG!

2008-05-26T12:44:00.001+02:00

A S.C.R. "Ledicia" únese á era da informática creando este blog. Cremos que é a maneira máis sinxela de que todos, socios e non socios, amigos e colaboradores, grandes e pequenos, teñades un contacto directo, diario e actualizado coas actividades da Asociación. Procuraremos que este sexa un lugar de reunión onde informarse dos proxectos en marcha, aportar novas ideas e, como non, dirixi-las críticas que cada un crea oportunas.